طبقنا هولحم في القدرة او الطاجين هذا الطبق اصله من ولاية ادرار و هوما يردمو القدرة تاع الفخار في
الرمل الساخن و يخلوه يطيب على مهل و هو طبق سهل التحضير
بدون اطالة الى المقادير
500غرام لحم غنم اوبقري
انا هنا استعملت البقري
بصلتين كبيرتين مقطعتين شرائح متوسطة
راس ثوم مهروس
بهارات : ملعقتين كبيرتين فواح ملعقة صغيرة فلفل اسود ملعقة صغيرة كركم ملعقة صغيرة فلفل زينة نصف ملعقة صغيرة زنجبيل و ملح حسب الرغبة
ملعقة كبيرة اكليل الجبل
مغرفة زيت زيتون
في صحن عميق نحطو اللحم تاعنا و نزيدو ليه ملعقتين زيت الزيتون والثوم و البهارات و الاكليل و نخلطوه جيدا بايدينا حتى يتشرب جيدا
في القدرة او الطاجين نحطو زيت الزيتون و نفرش فوقه البصل ثم اللحم و نغطيه و نضعه فوق نار هادئة جدا و خليه و روحي اخدمي شغلاتك لوخرين و مرة على مرة اضربي عليه طلة ما تنسيشو خلاص و ما تخافيش البصل راح يسيب الماء تاعو و يوفر الرطوبة اللازمة للحم باش يطيب و ما يتحرقش
انا هنا زدتليه شوية زيتون اخضر مغلي مسبقا هاذي الخطوة اختيارية على سبيل التغيير برك تزيديه كي قريب يطيب اللحم
بعد حوال ثلاث ساعات او ثلاث ساعات ونصف تلقيه طاب و المرق تاعو نشف و بقى منو القليل انا خليتو طاب مليح لان والدي يحبو ذايب زبدة
قدميه في نفس الطاجين اللي طاب فيه و زينيه بشرائح الليمون بصراحة هو طبق رائع و لذيذ جدا و البصل لما يتكرمل يعطي مذاق هايل
شهية طيبة