اليوم جبتلكم وصفة البوزلوف في الفرن .محمر وبنين طبعا للناس للي تحب تاكلو لانه في الكثير من الاشخاص ما يحبوهش
اذن ننظف البوزلوف على الطريقة المعتادة ونغسلو مليييييييييييييييح
نحطو في قدر فيه الماء ونتبلو ببصل وثوم وفلفل حار وحبة طماطم وورقة رند يعني كي العادة
نضعه يغلي لما يطيب
نصفيه ونعمل درسة متكونة من شوية زيت وطماطم مصبرة مع حبة مسكرفجة
ثوم ورقة رند ملح وتوابل وكاس ماء
نحطو في سينية الفرن ونفرغ فوقه الدرسة وندخلو للفرن ليتحمر
صدقوني بنة لا توصف
وعملت معاه مطلوع الفرن
2كيلات فرينة مع كيلة سميد رطب وملعقة اكل سكر و2 ملاعق اكل خميرة فورية
والملح والماء
شمخي كل المقادير خليه يرتاح 10دقائق المفروض ما يتعجنش لكن انا نحب نعجنو شوية وفي نفس الوقت
راني نزيد في الماء حتى اتحصل على عجين طري جدا
نخليه يرتاح حتى يخمر
نكسرو ونشكل قريصات نرمدهم في السميد ونقرصهم مباشرة على سينية الفرن المدهونة بشوية زيت وفرينة
نخليهم يخمرو ثم نطيبهم في فرن درجة حرارته عالية من تحت ومن فوق في نفس الوقت
لما نخرجو نحطو مباشرة في كيس بلاستيكي لبضع دقائق ثم نقدمو
واخيرا عملت معاهم تحلية بسيطة وهي محلبي العادية
